科帕沃於爾 Smaralind ‧ 凱夫拉維克 Keflavik - 冰島夏日環島自駕遊

Blog in Progress
離開 Snæfellsnes Peninsula 去 Keflavik 途中我哋經過一個叫 Borgarnes 嘅小鎮,喺嗰度我哋揾咗間 N1 油站附設嘅餐廳先搞掂餐晏晝。



同一般冰島嘅油站餐廳差唔多,哩間舖賣嘅一樣係漢堡包薄餅之類嘅快餐,都係平平哋大件夾抵食嗰隻喇。



食飽飯繼續行程,由 Borgarnes 去 Keflavik 途中可以選擇一條比較近、不過要穿過一條收費隧道嘅路線。



嚟到冰島咁多日,估唔到都有哩一千零一次塞車嘅機會,入隧道之前係咁兒塞咗幾分鐘車先去到收費閘口。



喺冰島消費基本上係接近完全唔需要用現金嘅,過哩條收費隧道亦唔例外,碌卡放低 ISK 1,000 大元買路錢就搞掂過得。



之前一晚同行朋友喺民宿一本雜誌度見到個 Smáralind 嘅廣告話想去行吓,原本出發前我哋嘅計劃係諗住臨上機之前返去 Reykjavik 行多個景點嘅,不過架車揸到嗰區附近,見重有大半個鐘先到 Smáralind 收舖嘅時間,於是忽然心血來潮決定唔去 Reykjavik,改為去哩度 shopping 買吓手信。



睇返啲資料哩間 Smáralind 都算係冰島數一數二嘅大型商場嚟,入到去行落個感覺查實有少少似香港啲商場,入面舖頭啲品牌好多都熟口熟面。



我見入面一啲家品店都可以揾到啲北歐國家生產製做嘅品牌,睇落啲貨品嘅款式同品質都幾吸引,另外哩度有間 66° North,哩間嘢都係好多遊客嚟到冰島 shopping 嘅目標嚟。



我朋友幫襯哩間賣禮品嘅舖頭,佢櫃位啲花紙包裝都整得幾有心機



哩個商場到晏晝六點半鐘啲舖頭就開始落閘關門,我哋都踩到啲舖頭落晒閘先舍得離場出車走人。事關之後嗰日我哋喺芬蘭要逗留大半日,之後再坐十幾粒鐘機返香港,中間應該唔會搵到地方涼沖;見之後咁長時間冇涼沖,原本我哋諗住哩晚最後一站係去 Blue Lagoon 浸個温泉順便沖埋個靚涼先上機嘅。



點知去 Blue Lagoon 個停車場見到四圍都係單車,我估嗰陣剛啱附近搞梗個大型嘅單車活動,啲人踩完單車個個都走去浸溫泉搞到個場瀑滿,結果我哋只係可以喺個場出面影張相入唔到去浸



返到香港睇返先知原來家陣 Blue Lagoon 會經常客滿,去到要保証有得入場嘅話都要事先上網預訂入場;一時大意出發前冇睇清楚哩部份嘅資料,結果去到摸咗次門釘。好彩我哋喺米湖嗰兩日有浸過嗰邊嘅温泉,未至於食晒白果起碼嚟到冰島咁多日都叫做浸過個平嘅温泉。



冇得浸温泉咁上機之前就多咗啲時間去 Hea,於是我哋就揸車去 Keflavik 睇睇有冇地方可以去食埋個晚飯先上機嘞。



去到 Keflavik 查實都已經夜晚八點幾好多舖頭都打晒烊,好彩俾我哋揾到一千零一間重開梗檔嘅餐廳。



間餐廳賣嘅都係漢堡包三文治煎個扒嗰類大路鬼佬嘢,餐牌嘅價錢都算相宜,我哋四個人食一餐夠飽嘅都係每人港銀一嚿水就落到樓。



食完飯我哋先去 Keflavik 市內一個 N1 油站打返爆個油缸,跟住擺低我哋兩位團友同啲行李喺機場之後,我同司機就去租車公司喺機場嘅舖頭度還車嘞。



查實咁夜租車公司間舖都已經打咗烊,咁舖頭冇人嘅話我哋就只需要將部車泊返好喺佢哋門口度,鎖好車門跟住將車匙入落佢哋門口嘅一個信箱度就可以。



還咗車我哋就行返過去機場嗰邊;喺機場大堂有個退稅櫃位,我哋之前喺冰島買返香港嘅嘢,只要同一張收據嘅銀碼夠 ISK 6,000 就可以退稅。



查實頭先喺 Smáralind 買嘢嗰陣啲售貨員已經幫我哋整好晒啲退稅單據,去到退稅櫃位只要成疊單交俾櫃位啲職員就可以,櫃位啲職員亦冇要求我哋出示買咗嘅商品,而退稅款額會之後退返去買家嘅信用卡户口度。



搞掂退稅我哋跟住就執返好啲行李寄倉再去候機室等上機嘞;時間係 2016 年六月一個晚上嘅零晨一點,我哋完成咗喺冰島一次超過 1,500 公里嘅旅程,再搭上哩班 FI352 號班機,出發去下一站芬蘭嘅赫爾辛基。

留言