教堂山 Kirkjufell ‧ Gatklettur 石拱門 ‧ Ytri-Tunga Beach 海豹黑沙灘 - 冰島夏日環島自駕遊

Blog in Progress
哩日係我哋喺冰島最後一日嘅行程,朝早我哋都係喺民宿度自己早餐自己煮,食完早餐就執行李出車,第一站先去 Grundarfjörður 一個必遊景點 Kirkjufell Mountain ~ 教會山。



查實由我哋住嗰間民宿外面都已經可以望到哩座外形尖尖嘅教會山。



由民宿出發只需要幾分鐘嘅車程,我哋先到達教會山山腳一個細細嘅停車場。



Kirkjufell 譯返做英語就係 Church Mountain,哩座教會山嘅高度有 463 米,係 Snæfellsnes Peninsula 北岸一個著名嘅地標嚟。



喺教會山嘅山腳有一個細細嘅瀑布 Kirkjufellsfoss,好多遊客都會嚟到影返張以教會山作為背景嘅瀑布例景。



喺停車場有一條石級可以行上去一條橫垮哩座瀑布嘅石屎橋。



行過石橋去到瀑布同河流嘅另一邊,就可以搵到影哩個例景嘅位置。



喺 Kirkjufell 影飽相,跟住我哋先揸車返去 Grundarfjörður 市內一間 Samkaup 借個洗手間鬆一鬆,之後就出車向 Keflavik 進發嘞。



上面個地圖就記錄咗哩日行程中我哋經過嘅一啲地方同景點。我哋沿住 54 號公路進發,首先到達嘅係一個叫 Gatklettur Arch 嘅景點;喺哩個景點一個停車場度泊好部車,落車之後首先可以睇吓一座叫 Bárðar Saga Snæfellsáss Statue 嘅巨人石像。



有關哩個巨人石像嘅典故查實是咁的,話說 Bárðar Saga Snæfellsáss 佢老母係人類,而佢老豆就一半係巨人一半係魔鬼嘅化身,佢自己就由一個叫 Dofri ~ the "mountain-dweller" of Dovrefjell 嘅人養大,簡單講哩位巨人係冰島一個傳說中嘅人物嚟。



由巨人石像向海邊行過去有一個觀景台,喺哩個觀景台度可以睇到岸邊一啲玄武岩同海蝕洞嘅地貌。



喺觀景台側邊有一條用膠網鋪好嘅行人路通去另一個觀景台。



沿住哩條行人路行幾分鐘就可以睇到哩個景點嘅主菜 Gatklettur Arch 嘞,哩個景點特別嘅地方,就係兩個經天然風浪侵蝕而成嘅圓形石洞。



睇完海蝕洞,我哋就行返轉頭出車向下一個景點進發嘞。



大約半個鐘車程就到達我哋下一個目的地 Ytri-Tunga Beach 嘞;每年夏天嗰幾個月,喺 Ytri-Tunga Beach 哩度會有一羣海豹喺哩度一個石灘一帶打躉,我哋諗住經過附近就順便嚟哩度停一停車碰吓運氣,睇吓有冇機會見到喺哩度打躉啲海豹。



喺 Ytri-Tunga Beach 有個停車場,我哋泊低部車之後就沿住一條小徑行去海邊嘅一個石灘度。



去到就見到啲海豹三五成羣咁攤喺石灘對出嘅海邊度。



見到其中一隻海豹條脛好似流梗血,唔知係咪剛剛爭女打完交嚟



啲海豹聚集嘅位置同岸邊嘅石灘之間嘅距離查實都幾遠吓,可能哩度啲海豹都重係對人類有戒心唔敢太接近人類嘅地頭;諗返幾年前喺紐西蘭南島啲海豹就大胆好多,喺嗰度見過一隻喺路邊瞓到隻豬咁直頭當經過啲人冇到,嗰次如果一個唔留意真係會一腳踩落隻嘢度。



睇完海豹時間亦差唔多,我哋要開始返歸嘅行程出車離開 Snæfellsnes Peninsula,向 Keflavik 嘅方向進發嘞。

留言