今年六月，正直冰島嘅初夏季節，我同埋幾個朋友喺冰島由 Reykjavik 出發，用咗十日時間揸車去到 Keflavik。

先講吓出發前嘅準備功夫，我哋係喺今年一月頭開始認真計劃個行程嘅，諗住喺六至八月冰島夏季嘅哩幾個月過去玩。

首先係訂機票，格過幾間航空公司同旅行社，最後格到芬蘭航空嘅來回經濟客位最平，航班要經芬蘭赫爾辛基轉機。當時大約喺一月尾，我哋見六月頭出發嘅話，芬航嘅經濟艙價位大約係 $ 7~8,000 左右，如果六月尾出發嘅話，差唔多時間機票嘅價位就升到九千尾到過萬。查返冰島到六月嗰陣啲天氣已經唔係太差，相差幾個禮拜張機票要俾貴差唔多二千文，於是就決定六月頭成行嘞。

當時我哋其中一個團友因為一啲事要遲我哋一個月先可以確定成行，結果我哋喺二月頭嗰陣訂嘅機票就盛惠每位港幣 $7,993 大元，遲啲訂機票嗰位朋友到二月尾上芬航個網站睇返，發覺同一航班嘅票價已經升到 $ 9,118。不過芬航啲機票票價原來都幾浮動吓，到佢真係訂嗰陣啲票價又跌咗幾百，最後佢三月頭訂到嘅票價就盛惠港幣 $8,720。寫哩篇遊記嗰陣身痕八卦吓上芬航睇番，見到出年六月頭差唔多時間嘅航班啲票價大約係七千中左右。所以哩張機票早訂同遲訂，票價都可以有一千幾百嘅差別㗎。

搞掂咗機票，跟住就到租車嘞。租車嚟講，除咗比較車租嘅價錢外，我覺得保險都係一個好重要嘅考慮嚟；喺冰島租車通常會見到下面哩幾種嘅保險項目:

CDW (Collison Damage Waiver) 同 SCDW (Super Collison Damage Waiver) 哩兩樣就比較大路，主要係保炒車所引至嘅賠償。除咗冰島之外，喺好多其他國家租車都有哩兩隻保險買嘅。

SADW (Sand and Ash Damages Waiver) 或者 SAAP (Sand & Ash Protection)，喺冰島有時會出現風沙暴，特別係喺冬季，如果唔好彩碰上，就有可能成部車俾啲風沙刮花；哩隻 SADW/ SAAP 就係保部車俾風沙損壞嗰陣嘅賠償。

GP (Gravel Protection)，喺冰島就算係最好揸嗰條一號公路都有少部份路段係啲冇舖平瀝青嘅爛路嚟，而且好多景點都要通過啲幾得人驚吓嘅崎嶇山路先去得到。GP 就係保部車嘅車身、擋風玻璃同車頭燈喺行哩啲崎嶇路段時俾路上啲石仔揩花撞淤嗰陣嘅賠償。

TP (Theft Protection)，雖然冰島係世上數一數二治安好嘅國家，不過整體治安點掂都好，都唔代表擔保一定冇賊嘅；萬一部車真係唔好彩俾人偷咗，就要靠哩隻保險理賠嘞。

參考咗好幾個講去冰島自駕嘅遊記，發覺當地一間舖號叫 Blue Car Rental 嘅租車公司都幾多人幫襯同寫佢啲評價都唔差，另一間 Reykjavik Rent a Car 見佢喺網上嘅評價亦係唔錯；查實我格價嗰陣主要都係比較哩兩間租車公司。基於相同車款同配套 (例如 GPS、Extra Driver)，同可以買嘅保險都盡量買齊哩兩個考慮，計番 Blue Car Rental 比 Reykjavik Rent a Car 嘅價錢就平咗大約 6%，不過 Reykjavik Rent a Car 嘅 SADW、GP 同 TP 嘅自付額都係 0 (Zero Excess)，剩係 SCDW 我哋重要負責 ISK 75,000 嘅自付額 (寫哩篇遊記嗰陣我去 Reykjavik Rent a Car 個租車網頁度睇返，發覺佢有個 Deductible 0 ISK 嘅 SCDW 選項；如果冇眼大睇過龍嘅話，我哋租車嗰陣應該重未有哩個 Zero Excess 嘅 SCDW 保險選項買嘅)。

而 Blue Car Rental 嘅 SAAP、GP 同 SCDW 都有自付額重要係都幾貴吓，GP 重要唔包擋風玻璃損壞，剩係 TP 係 Zero Excess。當時亦另外加多間舖號叫 Reykjavik Cars 嚟比較做個參考，哩間見網上就比較少人提，佢個車租同 Reykjavik Rent a Car 差唔多，SCDW、GP 同 SAAP 都有自付額不過個自付額就平過 Blue Car Rental，TP 都係 Zero Excess。

三間比較過之後我嘅結論係，雖然 Reykjavik Rent a Car 嘅車租貴咗少少，不過佢啲保險嘅保障就比較優勝。最後決定去馬幫襯哩間，整咗部 Subaru Outback 4WD，10 日租金連保險 GPS 加個 Extra Driver，盛惠 ISK 205,860。

今次喺冰島嘅十日九夜行程，總共要預訂八個地方嘅住宿。我哋到三月頭先開始搞，查實都已經有少少遲，嗰陣好多心儀嘅民宿都已經客滿。最後全部住宿都係經 Booking.com 預訂，算幾好彩哩次八間住宿都冇乜點中伏，間間都基本上係乾乾淨淨瞓得舒服嗰隻，之後寫到行程嗰陣再詳細講吓每一站住宿嘅資料。

錢方面，今次去冰島我哋一毫子現金都冇換過，全程食住行買嘢就算係過收費隧道都係碌卡搞掂。查實出發前幾日我試吓記低 Landsbankinn 嗰陣個 Notes Rate，想話比較吓如果喺香港換定美金或者歐羅再過到去換冰島現金使個匯率好啲吖，定還是碌卡個匯率好啲。不過返到香港睇返銀行月結單啲交易匯率，發覺查實啲匯率日日單單都唔同，好難做到好準確嘅比較。不過大至上我哋喺嗰邊碌卡最好同最差嗰個匯率比我出發前記低嗰個 Notes Rate 差別都只係 1% 左右，差別查實好細。考慮番碌卡比較方便，同埋換現金嘅話返香港前又要將啲用剩嘅現金換番美金歐羅哩啲嘅麻煩，我覺得去到嗰邊主力碌卡使錢應該會比較好啲。

今次喺冰島玩咗十日，加埋芬蘭轉機喺赫爾辛基玩咗大半日，返到香港埋數計番哩次行程平均每人各項嘅使費就係咁:

機票	:	HK$ 8,174
住宿	:	HK$ 5,655
租車	:	HK$ 3,244
入油	:	HK$ 657
其他交通費用	:	HK$ 127
超市購物	:	HK$ 613
外出用膳	:	HK$ 991
景點入場/ 活動費用	:	HK$ 2,384
其他雜項	:	HK$ 81

平均每人總計 HK$ 21,926，咁多日食住行玩嘅基本使費加埋每人盛惠 HK$ 22,000 有找。

衣著方面，冰島喺六月哩啲時間嘅氣温變化都好大，我哋試過喺幾度嘅氣温之下行冰川同啲重係舖住雪嘅山徑，猛太陽嗰陣亦可以暖到就咁著件短袖 T 恤都冇問題。所以嗰邊夏天著衫都係嗰句 ~ 要洋蔥式，易除易著方便適應比較大嘅温差。除咗衣著之外，我覺得鞋亦係一個好重要嘅考慮嚟。嗰邊行好多景點都要踩過啲又濕又鬆軟嘅泥地同雪地，經常行到一腳都係泥濘，所以一對防水防滑嘅行山鞋係好重要。另外如果諗住去行冰川嘅話，可以嘅話最好著啲高筒款式嘅行山鞋過去，事關行冰川用嗰對冰爪係要綁喺啲高筒款式嘅行山鞋上面，如果著去嘅鞋款唔啱綁哩啲冰爪，就要花多幾草嘢港幣另外租對高筒鞋嘞。

雖然我哋租車有租埋 GPS 地圖機，不過我去旅行已經習慣一定會裝定個離線地圖喺電話度。今次帶過去用嘅係一隻叫 maps.me 嘅免費離線地圖，哩隻 App Android 同 IOS 都有支援，可以直接喺電話下載分區嘅離線圖資。佢啲圖資基於 Open Street Maps，佔用嘅記憶空間好細，不過地圖嘅資料就好齊全，好多 Google Maps 冇嘅山徑路線佢都有好準確嘅圖資。另外哩隻地圖軟件可以基於景點、油站、停車場等等嘅類別作離線搜尋，特別係佢嗰個洗手間搜尋類別真係非常之幫到手，除咗經常幫我哋解決啲急需解決嘅問題之外 ，重幫我哋慳返唔少入收費洗手間嘅費用添。

去冰島玩自駕，有兩個網站基本上每日都應該上去望一望嘅。一個係 weather.is，哩個網站可以睇到冰島唔同地區嘅 6 日天氣預報。另一個 road.is 就係睇冰島分區嘅路況，例如邊啲路段係爛路 (gravel road)，邊度封路，同各種極端天氣例如大雪，風暴引至邊啲路段嘅路況轉差難行等等嘅資訊，都可以喺哩個網站度睇到。

準備功夫做得九九十十，亦差唔多到出發嘅日子嘞。時間係 2016 年 6 月頭嘅一個零晨，我哋一行四人坐上芬航嘅一班 AY070 號班機，先向芬蘭嘅赫爾辛基進發。